Category: காதல்


Kodai_Mazhai_Muthal_Thuli

உன் பார்வை
நெய்;
எரிகிறது என்
உயிர்தீபம்

*

உன் முத்தமீன்களை
கொத்திக் கொத்தி
கொழுத்துக்கிடக்கிறது
என் உயிர்ப்பறவை

*

நம் நிழல்கள்
கட்டிக்கொண்ட பொழுதில்
நீ சிந்திய வெட்கத்தில்
வானவில்லாக பரிணாமம் கண்டன
நம் நிழல்கள்!

*

கோடை மழையின்
முதல் மழைத்துளி
நீ
சிந்தும்
ஒற்றைப் பார்வை

*

நீ
என் உயிர் சாளரத்தின்
வெண்ணிலா

*

குளத்தில் இறங்குகிறாய்
உன் அழகு பொரிக்காக
காத்திருக்கின்றன
மீன்கள்

*

நீ
கண்டு அஞ்சியதிலிருந்து
தன் கம்பீரத்தினை
நொந்துக் கொண்டிருக்கிறான்
அய்யனார்

*

என் இதயதோட்டத்தில்
காதல் பூத்திருக்கிறது
எப்போது வருகிறார்
பறித்து சூட!

*

நீ
தொட்டுப் பறிக்க
மொட்டவிழ்கின்றன
பூக்கள்

*

காய்வதாகவே இல்லை
நீயும் நானும்
நனைந்த மழையின் ஈரம்

*

– ப்ரியன்

பெருமழை இரவொன்றில்
மயிர் நிறைந்த என்
மார்பில் முகம்புதைத்தபடி
அந்த கேள்வியை நீ கேட்டாய்

இந்த சினேகம்
இந்த யுகத்தில்தான்
உண்டானதென நினைக்கிறாயா என

இருவரையும் தூக்கி
காலபெருவெளியில் தள்ளியது
அந்த கணம்

இன்றுவரை
யுகங்களும் முடிவதாயில்லை
சினேகமும்.

– ப்ரியன்

Pattampoochi_Devathai

பூக்களை நாடும்
பட்டாம்பூச்சிகளுக்கிடையில்
நீ
பூக்கள் மொய்க்கும்
பட்டாம்பூச்சி

*

சிறகில்லை
விதவிதமான வர்ணமில்லை
என்றாலும்
நீ
தேன் சுமக்கும்
பட்டாம்பூச்சி

*

மலர் தாவி
மலர் அமர்கிறது
பட்டாம்பூச்சி
உன்
நளினத்தோடு

*

கோலத்தின் மையத்தில்
நீ
வைத்த அரசாணிப்பூ விடுத்து
புள்ளிகளை பூவென மொய்க்கின்றன
பட்டாம்பூச்சிகள்

*

படபடக்கும்
விழிகள் எப்போதும்
காட்டிக் கொடுத்துவிடுகின்றன
நீ
பட்டாம்பூச்சிகளின் தேவதை என்பதனை

*

பெருத்த சந்தேகம்
பூக்கள் மொட்டவிழ்வது
பட்டாம்பூச்சி அமரவா?
நீ சூடவா?

*

நின் நினைவுகளை
பின் தொடர்கிறேன்
பட்டாம்பூச்சி
துரத்தும் பிள்ளையின் குதுகலத்தோடு

*

மழைத்துளி
பூக்களை மீட்டுகிறது
நீ
மழை ஆடும்
தாள நயத்தில்

*

– ப்ரியன்

பழைய நாட்குறிப்பிலிருக்கும்
நிறம் இழந்த
பயணச்சீட்டு
ஆரம்பித்து வைக்கிறது
உன்னுடனானப் பயணங்களை

– ப்ரியன்

உனக்கான காத்திருப்புகளில்
யுகம் யுகமாய்
சரிந்தபடி
மணல் கடிகார
குடுவையினுள் மணல்.

– ப்ரியன்